Mancomun.org

Distribuir contido
Software libre en galego
Actualizado: fai 13 horas 30 min

Publicado o undécimo número do Boletín de Software Libre para o sector Empresarial

Xov, 19/04/2018 - 13:15

Xa está publicado o undécimo número do Boletín de Software Libre para o sector Empresarial, correspondente a este mes de Abril. O proxecto destacado deste mes é GnuCash, un software de finanzas persoal e para PEMEs.

No apartado de novas destacamos a publicación do novo artigo tecnolóxico sobre os Sistemas de Información Xeográfica, o obradoiro de WordPress de SmartPeme, así como outras actividades levadas a cabo por CNTG, CDTIC, GPUL e GSIC.

Boletín Software Libre na Empresa

Este boletín xurde polo éxito e o interese que está a ter o boletín adicado a mostrar as solucións de software libre que se están a empregar en diferentes administracións públicas. No caso deste novo boletín, tanto os proxectos e ferramentas destacadas como os casos de éxito e as novas recompiladas están orientada ao sector empresarial galego, tratando de difundir casos de éxito de aplicacións de software libre que están sendo empregadas por outras empresas ou ferramentas e proxectos de software libre que poden resultar de interese para o tecido empresarial, tanto para uso propio como tamén como posible opción de xerar negocio a través del.

Ademais de recompilar diferentes novas sobre solucións con software libre, todos os meses destacarase un proxecto ou ferramenta de software libre, así como un caso de éxito de implantación da mesma por parte dunha empresa, tratando de dar a coñecer non só a solución como tal senón mostrando un exemplo de que está a ser empregado e solucionando unha necesidade que calquera outra empresa pode ter tamén.

A administración alemá empregará Nextcloud para a súa nube privada

Xov, 19/04/2018 - 10:34

Nextcloud ven de anunciar que o goberno federal alemán escolleu Nextcloud como a solución a implantar para a súa nube privada.
Esta decisión foi tomada polo Informations Technik Zentrum Bund (ITZBund), que é o fornecedor de servizos informáticos centrais do goberno federal alemán.

Esta solución permite almacenar e compartir documentos dunha forma sinxela a través de internet ou unha rede privada, sendo esta a principal funcionalidade, pero Nextcloud vai máis aló e ten outras funcionalidades moi útiles e encamiñadas á produtividade tanto para a administración pública, como para empresas e incluso para os usuarios particulares como son mensaxería instantánea e vídeo conferencias, correo electrónico, calendario e contactos.
Nextcloud ofrece todo isto nunha mesma plataforma e ademais cumprindo con varias regulacións de protección de datos coma a GDPR e a HIPAA.

No caso alemán, decantáronse pola subscrición a Nextcloud Enterprise asegurándose así de ter o control dos seus datos, tendo acceso ao servizo de soporte e mantemento, así como unha garantía de servizo que ofrece a empresa Nextcloud GmbH que é a empresa que desenvolve o propio software e ofrece os servizos de soporte.

Fonte: https://nextcloud.com/blog/german-federal-administration-relies-on-nextcloud-as-a-secure-file-exchange-solution/

A aplicación de finanzas GnuCash libera a súa nova versión 3.0

Mér, 18/04/2018 - 09:03

GnuCash, que forma parte do proxecto GNU, comezou como un sistema de finanzas persoal no ano 1998, pero que pouco a pouco foi incorporando funcionalidades propias de sistemas de finanzas para pequenas empresas. Polo que hoxe en día se pode dicir que a aplicación GnuCash é unha aplicación válida para levar conta das finanzas de PEMEs e autónomos.

A ferramenta de finanzas de GNU lanzou a principios de mes a súa nova versión 3.0 que da comezo a unha nova serie de versións estables.
Entre as novas características e funcionalidades desta versión están:

  • A aplicación agora emprega o toolkit GTK 3 e a API WebKit2Gtk.
  • Nova interface de usuarios para xestionar ficheiros asociados a transaccións.
  • Novo forma de eliminar prezos antigos na base de datos que facilita o proceso.
  • Novos tipos de informes.
  • Novos importador de CSV.

E moitas outras novidades que pode ver ao completo no anuncio da versión.

A aplicación, que é multiplataforma, pódese descargar dende a páxina web oficial.

Este sábado O Recuncho Maker ofrece un obradoiro de deseño de placas PCBs con KiCad

Xov, 12/04/2018 - 18:41

O sábado 14 de abril o Recuncho Maker de Santiago organiza un obradoiro de deseño de placas PCBs co software libre KiCad.

KiCad é unha suite de software libre para a automatización do deseño electrónico. O programa é unha ferramenta que axuda no deseño de esquemas de circuitos electrónicos e a conversión en deseños de PCBs (do inglés Printed Circuit Board) para a súa posterior impresión e fabricación. KiCad é unha aplicación multiplataforma con soporte para Windows, GNU/Linux e MacOS e está licenciada baixo a GPLv3.

O obradoiro será fundamentalmente práctico, onde se deseñará unha placa para un cargador de pilas, pasando por todas as fases que son precisas para o seu deseño completo ata obter os ficheiros que se precisan para encargar a fabricación da nosa placa.

Pódese atopar máis información sobre o evento así como o formulario para o rexistro como asistentes na páxina do evento.

Red Hat Enterprise Linux actualiza á versión 7.5

Xov, 12/04/2018 - 11:00

A distribución de GNU/Linux empresarial de Red Hat acaba de sacar unha actualización para a súa última versión, a 7.5. Red Hat segue co seu enfoque en servidores, no mundo “cloud” e infraestrutura híbrida.
As novidades máis destacadas son a integración de OpenSCAP coa plataforma Red Hat Ansible Automation, melloras de rendemento con Virtual Data Optimizer (VDO), así como melloras na compatibilidade con Windows Server e Microsoft Azure.

Podes ver máis detalles sobre esta actualización na nova da páxina de Red Hat e nas notas da versión.

Este xoves arrancan as GSIC&beers con charlas sobre AngularJS e sobre Arduino LilyPad

Mar, 10/04/2018 - 19:44

O Xoves 12 de abril terá lugar na Coruña a primeira das sesión de GSICK&beers, unha nova iniciativa que xurde no Grupo de Seguridade da información de A Coruña, tamén coñecido como GSIC, e que ten como obxectivo facer comunidade local arredor da seguridade da información tendo como ferramentas a realización de sesións mensuais que se compoñerán de tres charlas breves arredor da seguridade e tecnoloxías web.

Esta primeira sesión conta con dúas conferencias sobre tecnoloxías libres:

A primeira, titulada “¿Cómo crear un aplicación con Angular en menos de 5 minutos?”, está impartida por Ana Cidre e Verónica Pérez Duro e será sobre AngularJS, que é un framework para desenvolvemento web empregando JavaScript desenvolvido por Google e licenciado coa licenza MIT que nos axuda a realizar interfaces web dunha forma moi áxil e rápida.

A segunda está titulada “¿Conoces a LilyPad?”, que impartirá Ana Martínez Pardo e falará sobre Arduino LilyPad. Arduino é unha plataforma de prototipado de microcontroladores composta por hardware e software libre moi empregada no mundo “Maker”, existen varios tipos de placas para realizar o prototipado, unha delas é LilyPad, que ten como característica principal ser o que se coñece como “wearable”, é dicir que se pode vestir, pois o LilyPad pode coserse á roupa e pode lavarse á man.

Pódese ver máis información sobre o evento na páxina de GSICKMinds así como apuntarte ao evento nesta ligazón.

Melisa organiza unha xornada de presentación de software libre para uso científico

Lun, 09/04/2018 - 19:06

A Asociación de Usuarios de Software Libre da Terra de Melide, coñecida como MeLiSA, organiza para este xoves día 12 unha presentación de Software Libre para uso Científico.
O evento terá lugar na Facultade de Matemáticas da USC e ten como obxectivo dar a coñecer e difundir software libre con aplicacións científicas. A xornada comezará ás 9:15 e rematará ás 11:30, tendo como poñencias principais “Presentación de MeLiSa. Licenzas libres” por Rafael Rodríguez Gayoso, “Software matemático e estatístico” por María José Ginzo Villamayor e “Presentación de Epilinux 5.0” por Miguel Ángel Rodríguez Muíños.

Un dos proxectos que se van a presentar é EpiLinux, o cal é unha distribución de GNU/Linux que ten un compendio de aplicacións científicas centradas nos campos da epidemioloxía, a bioestatística e os estudos de saúde en xeral, a maiores de software máis xenérico no campo científico como pode ser R, Octave, QGIS…

O acceso é libre e a inscrición é de balde, que se pode realizar na páxina do evento, onde tamén hai máis información sobre este.

O CNTG organiza unha xornada sobre a plataforma OpenStack de Red Hat

Mér, 04/04/2018 - 10:52

Este xoves 5 de abril de 16:00 a 20:00 o Centro de Novas Tecnoloxías de Galicia, tamén coñecido como CNTG, organiza na súa sede unha xornada sobre a plataforma OpenStack de Red Hat.

OpenStack é un proxecto de software libre de computación na nube que proporciona infraestrutura como servizo (IaaS), isto é, unha infraestrutura informática inmediata que se aprovisiona e administra a través da rede. Permite reducir e/ou escalar verticalmente os recursos con rapidez, para axustalos á demanda, e págase por uso.

A xornada será impartida por Fernando Ruiz-Tapiador e constará dunha pequena introdución teórica á que seguirán dous obradoiros guiados paso a paso.

Para máis información, podes consultar a páxina do evento e podes realizar a inscrición no evento a través da ligazón.

Publicado o Boletín de Reutilización de Software Libre nas Administracións Públicas deste mes de Abril

Mér, 04/04/2018 - 10:07

Xa está publicado o número 45 do Boletín de Reutilización de Software Libre nas Administracións Públicas correspondente a este mes de abril.

O proxecto destacado deste mes é Scylla, un sistema xestor de bases de datos NoSQL libre e distribuída que é compatible con Apache Cassandra. Scylla é unha solución para aqueles proxectos que xeren cantidades moi grandes de datos e precisen procesalos de forma eficiente.

No apartado de novas destacamos que o CDTIC organiza unha xornada sobre Ceph, que GNOME 3.28 está en galego e a nova publicación da serie de artigos sobre Sistemas de Información Xeográfica sobre solucións de escritorio.

Dende agosto de 2014, a oficina de coordinación de software libre da Amtega vén elaborando e difundido entre os responsables en materia TIC da Xunta de Galicia un boletín, de periodicidade mensual, sobre reutilización de software libre polas administracións públicas. Nel recóllense iniciativas sobre solucións libres, open data e estándares abertos; experiencias de uso de ferramentas libres que se identifican noutras administracións públicas de interese e aplicabilidade dentro da Xunta de Galicia; documentación ou formación de interese nesta materia, etc.

Dende Outubro de 2015, este boletín vense publicando no portal mancomún, co obxectivo de incrementar a difusión desta información noutras administracións públicas, como por exemplo as entidades locais, ou en calquera outra entidade ou organismo que lle poida ser de utilidade.

Novo artigo da serie de artigos tecnolóxicos dedicados a Sistemas de Información Xeográfica

Lun, 02/04/2018 - 22:16

Hoxe continuamos a serie de artigos tecnolóxicos centrados en ferramentas de Información Xeográfica, tamén coñecidas como SIX, ou en inglés GIS (Geographic Information System).

Dentro desta serie comezamos cun artigo que se centraba na solución QGIS, e con anterioridade realizamos un artigo centrado en gvSIG. Ambas, gvSIG e QGIS son as aplicacións GIS de escritorio libres máis empregadas, polo que esta nova entrega céntrase en realizar unha comparativa entre estas dúas aplicacións, sen esquecernos de que existen outras alternativas, tamén libres, a estas dúas aplicacións.

Neste segundo artigo realizase unha comparación entre gvSIG e QGIS, abordando diversos aspectos, dende como comezaron os proxectos, como funcionan, cada canto hai novas versión ata que presenza teñen no ecosistema galego. A parte desta comparativa entre as dúas solucións de escritorio máis empregadas en Sistemas de Información Xeográfica, tamén se comentan brevemente outras alternativas libres que poden resultar interesantes.

Os GPUL Labs continúan con unha sesión de introdución ao framework Nest

Lun, 02/04/2018 - 21:51

Este mércores 4 de abril no viveiro de empresas Accede Papagaio, a Asociación Universitaria Grupo de de Programadores e Usuarios de Linux, coñecida como GPUL, continúa a serie de conferencias, talleres e charlas “GPUL Labs“, que xa anunciamos previamente e na que teñen lugar eventos diversos ao longo do ano arredor de tecnoloxías libres onde se dan cita, estudantes, profesores, profesionais do sector e afeccionados ás novas tecnoloxías para difundir proxectos e solucións de software, hardware e coñecemento libre.

Esta semana o evento correrá a cargo de Arturo Silvelo, desenvolvedor full stack, quen fará unha introdución ao framework Nest. A sesión terá un carácter práctico e explicaranos como desenvolver aplicacións eficientes e escalables en Node.js empregando o framework Nest e para completar a explicación as asistentes implementarán unha API e uns tests para practicar os coñecementos adquiridos. Recomendase aos asistentes levar portátil con Node.js LTS e MongoDB 3.4 instalado. Podes anotarte e ver máis detalles sobre o evento na páxina do meetup.

Dende GPUL, lembran que aínda teñen oco para relatores e relatoras que queiran participar dunha forma máis activa dos GPUL Labs e impartir unha conferencia, un obradoiro, unha charla ou similares.
Se es unha empresa pode interesarche participar no programa de patrocinadores desta edición dos GPUL Labs.

 

Mozilla anunciou nova versión de Firefox

Ven, 23/03/2018 - 13:09

Firefox 59 foi anunciada por Mozilla a semana pasada e ten como novidades máis importantes varias relacionadas co seu rendemento e os tempos de carga das páxinas web, outro cambio é que a páxina de inicio é agora máis personalizable, a captura de pantalla foi mellorada e o soporte de comunicación en tempo real (RTC) foi refinado.

Publicado o décimo número do Boletín de Software Libre para o sector Empresarial

Xov, 22/03/2018 - 12:00

Xa está publicado o décimo número do Boletín de Software Libre para o sector Empresarial, correspondente a este mes de Marzo. O proxecto destacado deste mes é Ceph, unha plataforma de almacenamento masivo programable.

No apartado de novas destacamos as xornadas do CDTIC arredor do proxecto Ceph, varios eventos que está levando a cabo SmartPeme en Vigo e Lalín relacionados co software libre, o anuncio da nova versión de GNOME que está 100% en galego, así como os novos eventos de GPUL Labs e Coruña hacks na Coruña.

Boletín Software Libre na Empresa

Este boletín xurde polo éxito e o interese que está a ter o boletín adicado a mostrar as solucións de software libre que se están a empregar en diferentes administracións públicas. No caso deste novo boletín, tanto os proxectos e ferramentas destacadas como os casos de éxito e as novas recompiladas están orientada ao sector empresarial galego, tratando de difundir casos de éxito de aplicacións de software libre que están sendo empregadas por outras empresas ou ferramentas e proxectos de software libre que poden resultar de interese para o tecido empresarial, tanto para uso propio como tamén como posible opción de xerar negocio a través del.

Ademais de recompilar diferentes novas sobre solucións con software libre, todos os meses destacarase un proxecto ou ferramenta de software libre, así como un caso de éxito de implantación da mesma por parte dunha empresa, tratando de dar a coñecer non só a solución como tal senón mostrando un exemplo de que está a ser empregado e solucionando unha necesidade que calquera outra empresa pode ter tamén.

Xornada “Ceph, unha solución aberta para a xestión masiva de datos no teu CPD” no CDTIC

Mér, 21/03/2018 - 13:58

O CDTIC acollerá o vindeiro día mércores 4 de Abril de 9:30 a 14:00 horas unha interesante xornada sobre Ceph, unha solución aberta para a xestión masiva de datos.

Esta xornada está deseñada por e para a comunidade de Ceph. No programa inclúense os diferentes perfís e roles do ecosistema de Ceph. O obxectivo é permitir ao público asistente achegarse á plataforma Ceph desde diferentes ángulos e perspectivas coa intención non só de dala a coñecer a nivel teórico senón tamén de achegar as necesidades para adoptala de forma práctica na organización. Así, falarase tanto do hardware necesario, pasando por arquitecturas de referencia, identificación de provedores locais/nacionais, resolución de dúbidas e mesmo presentarase un caso de uso real nunha empresa galega.

A xornada conta coa inestimable colaboración dunha serie de empresas do ecosistema Ceph, como son Red Hat, o principal contribuidor no proxecto Ceph da comunidade Open Source; SUPERMICRO, líder global en tecnoloxía de servidores de alto rendemento, eficiencia e innovación; Colabora Ingenieros canle en España de Cumulus Networks, líder no achegamento a organizacións de todos os tamaños de modernas infraestruturas abertas de rede de escala de web; Dinahosting, empresa de servizos de rexistro de dominios e aloxamento web de Santiago de Compostela e Igalia, empresa galega de consultoría especializada en software libre e contribuidora de Ceph.

En resume, estas charlas constitúen unha boa oportunidade para coñecer a plataforma Ceph, independentemente do grao de coñecemento que se teña da mesma ou o nivel de madurez tecnolóxica da propia organización que considere a súa adopción.

A xornada vai dirixida a analistas, arquitectos TIC, administradores de sistemas/almacenamento, CIO e, en xeral, ao sector TIC con necesidades de deseño, aprovisionamento software/hardware, implementación, despregue e desenvolvemento de servizos de almacenamento distribuído e escalable.

Que é Ceph?

Ceph é unha plataforma de almacenamento programable, cunha enorme capacidade de escalabilidade e aberta deseñada para ser incluída na infraestrutura IT dunha organización y transformar así a súa capacidade para xestionar grandes volumes de datos. É válida para a infraestrutura e configuración da nube, repositorios multimedia, sistemas de copias de seguridade e restauración e Data Lake. Ceph persegue operar de forma completamente distribuída, sen un único punto de erro e escalando a nivel de exabyte.

Permite ás empresas liberarse das custosas solucións de almacenamento privativas e baseadas en hardware.

Programa

  • 9:30 Benvida e recepción. Presentación CDTIC

  • 9:45 Ceph máis alá de ser o mellor almacenamento unificado para OpenStack. Novos casos de uso. Luis Rico. Red Hat – Senior Solution Architect – Storage Specialist EMEA. Luis fará unha breve introdución a Ceph como solución de Software-Defined Storage capaz de proporcionar almacenamento unificado a OpenStack. Continurá presentando novos casos de uso para Ceph como almacenamento de obxectos: elastic data lakes de Big Data, repositorios de imaxes e videos, repositorios de xestión documental, destino de backup e arquivado.

  • 10:25 Solucións Hardware SDS / Ceph. David Ramirez, SUPERMICRO. Field Application Engineer España y Portugal. David falará de novidades relevantes HW, servidores e tecnoloxías de almacenamento para este tipo de soluciones SDS como Ceph.

  • 11:05 Introdución a Cumulus e a súa relación con Ceph. Francisco Rodriguez Moure, Socio Fundador de Colabora Ingenieros S.L. Ofrecerá unha introdución ao Open Switching e a Cumulus Networks e a súa relación con Ceph como solucións para arquitecturas de switching.

  • 11:15 Open and Web-Scale Networking: Cumulus Networks the Right Choice. Raf Vervloessem, Sales Representative Southern EMEA at Cumulus Networks. Cumulus Linux is the most flexible network operating system available because it runs on Linux. Our customers access flexibility, efficiency, speed and choice with a unified stack and a feature set designed for the digital age. With Cumulus NetQ, we empower organizations with full network validation and reduced downtime, and Cumulus Host Pack extends network visibility into containers

  • 11:45 Coffe Break

  • 12:15 Xestión de backups con Ceph Object Storage. Camilo Echevarne Carneiro. Félix Barbeira Salvado. Dinahosting. Falarán de como están implementando Ceph para o almacenamento de backups de todas as máquinas dos seus clientes, actualmente unhas 2500. Contarán como con Ceph foron capaces de solucionar os problemas de escalado que teñen co sistema actual baseado en discos RAID para almacenar ao redor de 1PB de información. Revisarán a infraestrutura e as decisións que foron tomando ata chegar á configuración actual, así como os axustes de tuning do clúster. Contarán o tipo de máquinas que usan para isto, como automatizan o seu ciclo de vida: despregue, monitorización, actualizacións, etc. Así mesmo ofrecerán información sobre proxectos futuros que lles permitiría levar a cabo este tipo de tecnoloxía.

  • 12:55 Consultoría upstream en Ceph/RadosGW/S3. Javier Muñoz Mellid. Software developer en Igalia e contribuidor upstream de Ceph. Falará de como é posible axudar ás empresas a diferenciarse no mercado vía colaboracións upstream en Ceph. Como unha empresa pode desenvolver e comercializar produtos e servizos de cloud RadosGW/S3 contando a experiencia dun caso de éxito dun dos seus clientes.

  • 13:35 Debate e quenda de preguntas

  • 14:00 Fin da xornada

O pdf do programa completo pode descargarse da web do CDTIC.

A asistencia é gratuíta previa inscrición a través do portal do CDTIC, do Espazo Empresa e Profesionais.

Agardamos que o evento sexa un recurso útil para unha ampla audiencia e mesmo sexa quen de fortalecer a comunidade galega de Ceph.

Os GPUL Labs continúan con un obradoiro de testing en JavaScript con Jest

Mar, 20/03/2018 - 01:30

Este mércores 21 de marzo na Facultade de Informática da Coruña a Asociación Universitaria Grupo de de Programadores e Usuarios de Linux, coñecida como GPUL, continúa a súa serie de conferencias, talleres e charlas “GPUL Labs“, que xa anunciamos na nova e na cal teñen lugar eventos diversos ao longo do ano arredor de tecnoloxías libres punteiras, onde se dan cita, profesionais do sector, profesores, estudantes e afeccionados ás tecnoloxías para difundir software, hardware e coñecemento libre.

Esta semana o evento da serie corre a cargo de David Barral da empresa Trabe, cunha charla titulada “Testing JavaScript con Jest“, na que nos falará de como se pode realizar testing en JavaScript. Nas aplicacións modernas as tarefas de testing manuais son complexas e dependendo do tamaño da aplicación, incluso inabordables, polo que se solen empregar ferramentas que nos axuden a realizar o testing.
Un exemplo destas ferramentas é Jest, que é un framework libre licenciado coa licenza MIT e creado pola empresa Facebook, arredor do cal xirará o obradoiro que terá lugar este mércores e no que te podes apuntar no meetup.

Dende GPUL, lembran que aínda teñen oco para relatores e relatoras que queiran participar dunha forma máis activa dos GPUL Labs e impartir unha conferencia, un obradoiro, unha charla ou similares.
Se es unha empresa pode interesarche participar no programa de patrocinadores desta edición dos GPUL Labs.

GNOME 3.28 está en galego

Lun, 19/03/2018 - 17:34

O proxecto GNOME acaba de presentar a súa nova versión 3.28 completamente traducida ao galego polo equipo de tradución de GNOME ao galego que forma parte da asociación Trasno. Este equipo de tradutores tamén publicou os recursos lingüísticos derivados das tarefas de tradución de GNOME 3.28 para a súa posible reutilización por parte doutros tradutores, pois están licenciado coa licenza libre Creative Commons By-SA 3.0 (Recoñecemento-CompartirIgual).

A nova versión de GNOME, a 3.28, é o resultado do traballo de 6 meses por parte da comunidade de GNOME, con un total de 28459 cambios e 753 contribuidores. Que dan lugar a unha serie de funcionalidades ou característica novas e tamén melloras e arranxos de erros. Podes ver todas a novidades na nota da versión. Como destaque de novas características podemos contar con:

Escolla de favoritos: No navegador de ficheiros, agora poden marcarse como favoritos ficheiros e cartafoles, para aparecer así na barra lateral.

Melloras na organización persoal: Existen diversas melloras das
funcionalidades que hai no compendio de aplicacións de organización persoal como por exemplo: Os contactos poden ordenarse por apelido ou por nome. A vista de calendario mensual foi mellorada…

Varias melloras de aparencia como por exemplo o tipo de letra por defectos da interface que redunda nunha maior lexibilidade, aumento da colección de fondos de escritorio…

Multimedia e entretemento: Na aplicación de Fotos agora é máis doado agregar fotografías á nosa colección e tamén temos novas ferramentas de edición para sobras e realces.

Aplicación Uso: Con esta nova aplicación permítese visualizar o consumo de CPU, memoria e disco, incluso ten funcións para limpar o lixo e ficheiros temporais.

Esta nova versión de GNOME estará dispoñible nas distintas distribucións de GNU/Linux á medida que os desenvolvedores destas vaian incorporando esta novas versión nos repositorios destas. Anque se es desas persoas que non pode agardar, sempre podes descargar o código fonte da súa forxa e compilalo para poder desfrutar desta nova versión.

Tanto o equipo de tradución de GNOME ao galego coma o equipo de desenvolvemento seguen precisando axuda de voluntarios para traducir e desenvolver este entorno de escritorio, polo que se estás interesado en axudar, podes acceder á páxina para involucrarte tanto na tradución coma no desenvolvemento.

 

Gnome renóvase coa versión 3.28

Xov, 15/03/2018 - 17:39

A comunidade de Gnome ven de anunciar a súa versión 3.28.
Gnome é un dos entornos de escritorio maioritarios en GNU/Linux que destaca por ser un entorno simple de cara á experiencia de usuario.
Algunhas das novidades introducidas nesta versión de Gnome son: Marcación de favoritos no navegador de ficheiros. Melloras na aplicación de organización persoal. Tipografía por defecto máis bonita. Novas características multimedia. Estatísticas de uso de recursos…
Se queredes ver máis detalles, podedes ver as notas da versión.

GitHub libera unha ferramenta para axudar a licenciar proxectos de software libre chamada Licensed

Mér, 14/03/2018 - 11:50

GitHub, a forxa máis empregada para aloxar proxectos de software libre, acaba de liberar Licensed.
Licensed era unha ferramenta interna de GitHub, que acaban de cambiar e licenciar coa licenza MIT e publicar para todos os usuarios da plataforma.

Esta ferramenta é unha axuda á hora de poder escoller unha licenza para un proxecto de software. A tarefa de elixir unha licenza para un proxecto pode non ser doada, sobre todo tendo en conta que nun proxecto podémonos atopar con múltiplas dependencias de outros proxectos. Aínda que estas dependencias sexan software libre, algunhas destas poden ter restricións que nos afecten á hora de poder escoller determinadas licencias.
Licensed axúdanos á hora de realizar esta tarefa do noso proxecto de software libre. Esta analiza as dependencias que ten o proxecto, lista as súas dependencias de licenzas e alerta de posibles problemas con licencias incompatibles.
De todos xeitos esta tarefa debe ser supervisada por un humano, de feito o equipo de desenvolvedores de Licensed advirten que o obxectivo da aplicación é automatizar a documentación das licencias das dependencias pero que non é un substituto dunha revisión humana nin de un asesoramento legal, pese a esta advertencia esta ferramenta pode axudar a atopar de forma automática e temperá posibles incompatibilidades de licenzas.

Podedes atopar o anuncio oficial de GitHub nesta páxina e o código fonte xunto coa documentación do proxecto, así como unha pequena guía de configuración están dispoñibles na forxa.

 

Fonte: https://www.muylinux.com/2018/03/08/github-licensed/

Publicado o Boletín de Reutilización de Software Libre nas Administracións Públicas deste mes de Marzo

Mér, 14/03/2018 - 11:48

Xa está publicado o número 44 do Boletín de Reutilización de Software Libre nas Administracións Públicas correspondente a este mes de marzo.

O proxecto destacado deste mes é Joomla!, un dos sistemas xestores de contidos máis empregados para o desenvolvemento de portais web con soporte para multiplos idomas, SEO e SEF integrado, xestión de usuarios… É unha ferramenta que como vemos nos casos de éxito expostos se emprega con frecuencia nas administracións públicas para o desenvolvemento de portais diversos.

No apartado de novas destacamos que a Amtega publicou como software libre o seu arquetipo corporativo, o goberno letón comprométese cos datos abertos, o comezo do programa GSoC e Coruña Hacks.

Dende agosto de 2014, a oficina de coordinación de software libre da Amtega vén elaborando e difundido entre os responsables en materia TIC da Xunta de Galicia un boletín, de periodicidade mensual, sobre reutilización de software libre polas administracións públicas. Nel recóllense iniciativas sobre solucións libres, open data e estándares abertos; experiencias de uso de ferramentas libres que se identifican noutras administracións públicas de interese e aplicabilidade dentro da Xunta de Galicia; documentación ou formación de interese nesta materia, etc.

Dende Outubro de 2015, este boletín vense publicando no portal mancomún, co obxectivo de incrementar a difusión desta información noutras administracións públicas, como por exemplo as entidades locais, ou en calquera outra entidade ou organismo que lle poida ser de utilidade.

Os GPUL Labs continúan con humanidades xeoespaciais da man de Emapic

Lun, 12/03/2018 - 11:29

Este xoves 15 de marzo na Facultade de Informática da Coruña a Asociación Universitaria Grupo de de Programadores e Usuarios de Linux, coñecida como GPUL, continúa a súa serie de conferencias, talleres e charlas “GPUL Labs“, que xa anunciamos na nova e na cal teñen lugar eventos diversos ao longo do ano arredor de tecnoloxías libres punteiras, onde se dan cita, profesionais do sector, profesores, estudantes e afeccionados ás tecnoloxías para difundir software, hardware e coñecemento libre.

Esta semana o evento da serie corre a cargo de Arantxa Serantes, cunha charla titulada EMAPIC en el contexto de las SPATIAL HUMANITIES & pGIS, na que nos falará de proxectos de humanidades espaciais centrándose na ferramenta Emapic, que é unha ferramenta de software libre iniciada no cartoLAB da UDC e nos permite incorporar representacións xeográficas das emocións, propostas, demandas ou calquera tipo de opinións, podendo chegar a ser un instrumento de análise no campo das “Spatial Humanities” e “Smart Cities” sobre todo no eido da participación cidadá.

Dende GPUL, lembran que aínda teñen oco para relatores e relatoras que queiran participar dunha forma máis activa dos GPUL Labs e impartir unha conferencia, un obradoiro, unha charla ou similares.
Se es unha empresa pode interesarche participar no programa de patrocinadores desta edición dos GPUL Labs.