A Secretaría de Estado de Universidades abre a convocatoria para a solicitude de préstamos para estudantes
A Secretaría de Estado de Universidades e Investigación abriu a convocatoria pública para a solicitude de préstamos para estudantes. Segundo se desprende da convocatoria, o importe máximo individual dos créditos para o curso 2005-2006 será dun mínimo de 2.500 e dun máximo de 6.000 euros para cursar estudos de posgrado (máster ou doutoramento). No caso de cursar estudos universitarios de licenciatura, enxeñería superior, arquitectura ou diplomaturas, enxeñerías técnicas ou arquitecturas técnicas, a contía reducirase a un mínimo de entre 1.500 e un máximo de 4.000 euros.
Os solicitantes deberán posuir nacionalidade española ou dun país da Unión Europea ou, no caso de ser estranxeiros, ser residente en España. Ademais, deberán estar matriculados ou preinscritos nalgunha das universidades españolas publicas ou privadas legalmente recoñecidas.
No caso de que os solicitantes precisen o préstamo para a realización de estudos de posgrao, éstes deben ter cursado estudos completos de licenciado, arquitecto ou enxeñeiro superior, así como os diplomados, enxeñeiros e arquitectos técnicos, incluídos no seu caso os que correspondan ao proxecto fin de carreira, que dean acceso aos estudos de posgrao para os que se solicite o préstamo.
Para as solicitudes de préstamos para cursar estudos de licenciatura, enxeñería superior ou arquitectura, deberán ter superado un número de créditos non inferior a 120 ou ter aprobados os dous primeiros cursos completos para os alumnos do plan antigo. Para os de diplomaturas, enxeñerias técnicas ou arquitecturas técnicas, deberán ter superado un mínimo de 60 créditos ou ter aprobado o primeiro curso completo para os alumnos do plan antigo.
As solicitudes e a documentación presentaranse no prazo comprendido entre o día seguinte ao da súa publicación e ata o vindeiro 21 de outubro. O modelo de solicitude pode conseguirse premendo en Máis información.
DUVI, 13/09/05
- 1835 lecturas
