USC: Comeza a avaliación das titulacións Licenciado en Economía e Licenciado en Administración e Dirección de Empresas

USC: Comeza a avaliación das titulacións Licenciado en Economía e Licenciado en Administración e Dirección de Empresas
Dentro do Programa de Evaluación Institucional da ANECA

Un comité externo integrado por tres especialistas iniciará o vindeiro luns, día 22, o proceso de avaliación externa da Licenciatura en Economía e da Licenciatura en Administración e Dirección de Empresas, pertencentes á Facultade de Económicas e Empresariais.

A avaliación destas titulacións correrá a cargo dun comité externo integrado por Carmen Arguedas Tomás, da Universidade Europea de Madrid; José Ramón Repeto Gutiérrez, da Universidade de Cádiz; e por Alicia Sanchís Arellano, do Banco de España.

Esta avaliación está integrada nas actividades previstas no Programa de Evaluación Institucional (PEI) da Agencia Nacional de Evaluación de la Calidad y la Acreditación (ANECA), sendo o seu principal obxectivo facilitar a preparación de futuros procesos de acreditación das ensinanzas conducentes á obtención de títulos universitarios de carácter oficial e validez en todo o territorio nacional, a través da experiencia en procesos de avaliación, utilizando os mesmos criterios e indicadores que serán utilizados no seu día para a acreditación.

A avaliación institucional é un proceso de diagnóstico das fortalezas e debilidades que conclúe coas propostas de mellora que sería necesario implementar para aumentar a calidade da ensinanza avaliada e favorecer a obtención da homologación no seu momento.

USC Xornal electrónico, 18/03/04